Read also:
చేతిలో స్మార్ట్ఫోన్ ఉంది.. డౌట్ ఏదైనా ఉంటే అడగండి.. గూగుల్లో సెర్చ్ చేసి చిటికెలో చెప్పేస్తా’ననే ధీమాలో ఉన్నారా? గూగుల్ సెర్చింగ్లో మీరే కింగ్ అనుకుంటున్నారా? మీకో విషయం తెలుసా.మీరు వెరీ పూర్. మీరే కాదు.మీ చుట్టూ ఉన్నవారిలో 80 శాతం మంది మీలాంటివారే.
ఇంటర్నెట్ లేనిరోజుల్లో ఏదైనా తెలుసుకోవడానికి పెద్దవాళ్ల సాయం తీసుకునేవాళ్లం. అమ్మానాన్నలు, నానమ్మ తాతయ్యలు, టీచర్లు, లెక్చరర్లు, ఎక్స్పర్ట్స్.. మనకు తెలియని ఎన్నో విషయాల గురించి చెప్పింది వీళ్లే. మరి మన పిల్లలకు కూడా వీళ్లే చెబుతున్నారా? నో..! ఇంటర్నెట్ అందుబాటులోకి వచ్చిన తర్వాత.. స్మార్ట్ఫోన్ చేతిలోకి వచ్చిన తర్వాత.. కావాలసినంత డేటా అతి తక్కువ ధరకే దొరుకుతున్న ఈ రోజుల్లో.. డౌట్స్ క్లియర్ చేసుకోవడానికి ఇంకా పెద్దవాళ్ల సాయం అవసరమా? జస్ట్ గూగుల్ చేస్తే సరిపోతుంది కదా? ఈ తరం పిల్లల్లో చాలామంది అభిప్రాయం ఇదే. పెద్దవాళ్లు ఏదైనా చెప్పినా‘నీకేం తెలియదమ్మా. ఊరుకో’అనేస్తున్నారు. గూగులమ్మ చెప్పిందే వేదమనుకుంటున్నారు. ఈ అభిప్రాయంతో ఉన్నవాళ్లంతా కచ్చితంగా చదవాల్సిన మ్యాటర్ ఇది. ఎందుకంటే.మనలో 80 శాతం మంది గూగులింగ్ చేయడంలో చాలా పూర్ అని తాజాగా కొన్ని స్టడీలు తేల్చాయి.
అకడమిక్ లైబ్రేరియన్స్ 2011లో చేసిన ఓ స్టడీ ప్రకారం.. విద్యార్థుల్లో చాలామందికి తమకు కావలసిన సమాచారం కోసం గూగుల్లో ఎలా సెర్చ్ చేయాలో తెలియదు. ఏ పదాలను సెర్చ్ బాక్స్లో టైప్ చేయాలో? చేశాక కనిపించే ఆప్షన్లలో ఏ పేజీని ఓపెన్ చెయ్యాలో? కూడా తెలియదు. ఇటీవల స్టాన్ఫోర్డ్ రీసెర్చర్స్ నిర్వహించిన స్టడీలో గూగుల్ సర్వీసెస్ను వాడుతున్న 80 శాతం మందికి దానిని సరిగ్గా ఉపయోగించడం రాదని తేలింది. ఎన్నో ప్రయత్నాల తర్వాతే వారికి కావలసిన సమాచారం పొందుతున్నారట. కొందరైతే ముందుగా ఏ ఇన్ఫర్మేషన్ కనిపిస్తే అదే కరెక్ట్ అనుకుంటున్నారట. సరైన సమాచారం కోసం రెండో ప్రయత్నం చేయకుండానే ఓ నిర్ణయానికి వచ్చేస్తున్నారట. ఇక పిల్లల విషయానికి వస్తే.. గూగులింగ్లో ఎబోవ్ యావరేజ్ అనిపించుకుంటున్నవాళ్లు వందలో కనీసం ఐదారుగురు కూడా ఉండడం లేదట.
నిజానికి మనకు కావాల్సిన ఏ సమాచారమైనా గూగుల్లో ఉంటుంది. కానీ సరైన సమాచారాన్ని వెతికిపట్టుకునే పద్ధతే చాలామందికి తెలియడం లేదు. అందుకే 80 శాతం మంది గూగులింగ్లో పూర్ అనిపించుకుంటున్నారు. వీళ్లందర్నీ ఎబోవ్ యావరేజ్ స్టేజ్కు తీసుకురావడానికి గూగుల్ సంస్థలో పనిచేస్తున్న సైంటిస్ట్ డేనియల్ రస్సెల్ ‘ద జాయ్ ఆఫ్ సెర్చ్’ పేరుతో రాసిన బుక్లో కొన్ని టిప్స్ సూచించారు. వాటిలో కనీసం ఈ ఐదు టిప్స్ పాటిస్తే.. పూర్ స్టేజీ నుంచి బెటర్ అనిపించుకోవడం ఖాయమంటున్నారు ఎక్స్పర్ట్స్.
సెర్చ్ స్కిల్స్ను మెరుగుపర్చుకోవడానికి పాటించాల్సిన టిప్స్ గురించి రస్సెల్ కొన్నేళ్లుగా తన బ్లాగ్లో కూడా రాస్తున్నారు. అయితే కొత్త రెసిపీ కోసమో, దగ్గర్లో ఉన్న ఫార్మసీ అడ్రెస్ కోసమో కాకుండా ఏదైనా విషయంపై అక్యూరేట్ ఇన్ఫర్మేషన్ పొందడమెలా? అనేదానిపై బ్లాగ్లో చాలా డీటెయిల్గా వివరిస్తున్నారు. వాటిలో టాప్ టిప్స్ ఇవి.
ఫస్ట్ ఆన్సర్తోనే ఆగిపోవద్దు.
గూగులింగ్ చేసేటప్పుడు ఏదైనా సమాధానం కోసం సెర్చ్ చేస్తుంటే.. వచ్చే ఫస్ట్ ఆన్సర్ దగ్గరే ఆగిపోవద్దు. అదే ఫైనల్ ఆన్సర్ అని కూడా అనుకోవద్దు. కనీసం రెండు మూడుసార్లయినా సెర్చ్ చేస్తుంటే డిఫరెంట్ ఆన్సర్స్ వస్తాయి. అప్పుడు వాటిలో నుంచి అక్యూరేట్ ఆన్సర్ ఏదో సెలెక్ట్ చేసుకోవడం ఏమంత కష్టం కాదు. పైగా ఆ ఆన్సర్ తప్పు అయ్యే ఛాన్సే ఉండదు. ఒకటికి మించి సమాధానాలు దొరికే అవకాశం కూడా ఉంటుంది.
ఎవరు చెప్పారు. ఎందుకు
గూగుల్ను ఏదైనా అడిగినప్పుడు సమాధానం కనిపించిన వెంటనే దానిని ‘ఎవరు చెప్పారు?’ ‘ఎందుకు’ అని మిమ్మల్ని మీరు ప్రశ్నించుకోండి. చాలామంది తమ వెబ్సైట్లో ఇన్ఫర్మేషన్ పెట్టినప్పుడు ఆయా సందర్భాలకు అనుగుణంగా ఆన్సర్స్ ఉండే అవకాశముంది. మరికొంతమంది కొన్ని ప్రయోజనాలను ఆశించి ఇన్ఫర్మేషన్ పెడుతుంటారు. పొరపాటున అదే నిజమని మనం డిసైడ్ అయితే.. వారి వలలో పడినట్లే. అందుకేసమాధానం కనిపించిన వెంటనే సోర్స్ గురించి ఓసారి తెలుసుకోండి. ఆ ఇన్ఫర్మేషన్ను పెట్టినవారు ఫేక్ కాదని డిసైడ్ చేసుకున్న తర్వాతే సమాధానం నిజమైనదని నమ్మొచ్చు.
మీ ఆన్సర్ను సెర్చ్ చేయొద్దు
మనకు తెలిసిన ఆన్సర్ను కలుపుతూ సెర్చ్ చేయడం కూడా కరెక్ట్ కాదు. ఎందుకంటే.. మనం టైప్ చేసిన సమాధానానికి సంబంధించిన ఇన్ఫర్మేషనే మనకు స్క్రీన్పై కనిపిస్తుంది. అటువంటప్పుడు అసలైన సమాధానం దొరక్కపోవచ్చు. ఏదైనా ప్రశ్నకు ఆన్సర్ వెతుకుతున్నప్పుడు కేవలం ప్రశ్నను మాత్రమే టైప్ చేసి సెర్చ్ చేయండి. పొరపాటున కూడా మీకు తెలిసిన ఆన్సర్ను ప్రశ్నతో కలిపే ప్రయత్నం చేయొద్దు.
కీ వర్డ్స్దే.కీ రోల్
ఏదైనా సెర్చ్ చేసేముందు ఏయే కీవర్డ్స్ను సెర్చ్ బాక్స్లో టైప్ చేయాలో ఓసారి డిసైడ్ చేసుకోవాలి. సెర్చింగ్లో ఎక్స్పర్ట్స్ అనిపించుకున్నవాళ్లు ఒకటికి మించి ట్యాబ్స్ ఓపెన్ చేస్తారు. ఒక్కో ట్యాబ్లో డిఫరెంట్ కీవర్డ్స్తో సెర్చ్ చేస్తుంటారు. అటువంటప్పుడే ఎక్కువ ఇన్ఫర్మేషన్ను తెలుసుకునే అవకాశం దొరుకుతుంది. ఒకే ట్యాబ్లో ఒకటి లేదా రెండు కీవర్డ్స్తో సెర్చ్చేస్తే వాటికి సంబంధించిన ఇన్ఫర్మేషన్ మాత్రమే కనిపిస్తుంది.
బేసిక్ ఆపరేటింగ్ స్కిల్స్.
ఏదైనా ర్చ్ చేసేటప్పుడు మనకు కనీసం బేసిక్ స్కిల్స్ తెలిసుండాలి. కామాస్, ఫుల్స్టాప్స్, కోలన్స్, సెమీకోలన్స్, ఇన్వర్టెడ్ కామాస్ వంటివి ఉపయోగించడం తెలిసుండాలి. కొన్నిసార్లు ఇవి లేకుండా సెర్చ్ చేస్తే మనకు అవసరమైన సమాధానం రాకపోవచ్చు.
పొరపాటుగా ఇవి ఉపయోగించినా తప్పు సమాధానం రావచ్చు. కాబట్టి ఎటువంటి సందర్భంలో కామాను వాడాలి? సెమీకోలన్స్ ఎప్పుడు వాడతారు? ఇన్వర్టెడ్ కామాస్ మధ్యలో ఏదైనా పదం ఉంటే దాని అర్థమేంటి? వంటి బేసిక్ ఆపరేటింగ్ స్కిల్స్ గురించి అవగాహన పెంచుకోవాలి.