Read also:
క్రెడిట్ కార్డుతో కొన్ని లావాదేవీలు నిర్వహించకూడదు
లేదంటే ఆ కార్డు బ్లాక్ అయిపోయే ప్రమాదముంది
ఫెమా రూల్స్‌ను అతిక్రమిస్తే సమస్యలు తప్పవు
కస్టమర్లను హెచ్చరిస్తున్న బ్యాంకులు
దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) కస్టమర్లకు అలర్ట్. బ్యాంక్ క్రెడిట్ కార్డు ఉపయోగించేవారు కొన్ని విషయాలు తెలుసుకోవాలి. కార్డు ఇష్టానుసారంగా ఉపయోగిస్తే సమస్యలు ఎదుర్కొనే అవకాశముంది. కొన్ని సందర్భాల్లో కార్డు బ్లాక్ అయిపోవచ్చనే ప్రమాదం కూడా ఉంది.
బ్యాంకుల పెద్దన్న రిజర్వు బ్యాంక్ ఆఫ్ ఇండియా (ఆర్‌బీఐ) ఫారిన్ ఎక్స్చేంజ్ మేనేజ్‌మెంట్ యాక్ట్ 1999 (ఫెమా) కింద బ్యాంకులకు కొన్ని నిబంధనలను వర్తింపజేసింది. బ్యాంకులు తమ కస్టమర్లను పలు లావాదేవీలు నిర్వహించకుండా చూసుకోవాలని ఆదేశాలు జారీ చేసింది. బ్యాంక్ క్రెడిట్ కార్డు ఉపయోగిస్తున్న వారికి ఈ రూల్స్ వర్తిస్తాయి.
ఆర్‌బీఐ నిబంధనల నేపథ్యంలో స్టేట్ బ్యాంక్ కూడా తన క్రెడిట్ కార్డు వినియోగదారులను కొన్ని ట్రాన్సాక్షన్లు చేయవద్దని హెచ్చరించింది. ఫారెక్స్ ట్రేడింగ్, లాటరీ టికెట్స్ కొనుగోలు, కాల్ బ్యాక్ సర్వీసెస్, బెట్టింగ్, గ్యాంబ్లింగ్, నిషేధానికి గురైన మేగజైన్స్ వంటి కొనుగోళ్లకు క్రెడిట్ కార్డు ఉపయోగించొద్దని ఎస్‌బీఐ తెలిపింది.
ఫారెక్స్ ట్రేడింగ్ వ్యాపారులు, క్యాసినోలు, పలు వెబ్‌సైట్స్ క్రెడిట్ కార్డుల ద్వారా చెల్లింపులు చేయవచ్చని చెబుతుంటాయని, అయితే కస్టమర్లు జాగ్రత్తగా ఉండాలని ఎస్‌బీఐ హెచ్చరించింది. కొందరు కస్టమర్లు ఫారిన్ ఎక్స్చేంజ్ పోర్టల్స్, వెబ్‌సైట్స్‌లో క్రెడిట్ కార్డుల ద్వారా ట్రాన్సాక్షన్లు నిర్వహిస్తున్నారని, ఇలాంటివి చేయవద్దని పేర్కొంది. నిబంధనలు అనుమతించని లావాదేవీలకు క్రెడిట్ కార్డు ఉపయోగిస్తే.. కార్డు బ్లాక్ అవ్వొచ్చని హెచ్చరించింది.
